2026 թվականի մայիսի 12-ին, Հռոմում, Քրիստոնեական Միության խթանման բաժնի գրասենյակում, գումարվեց Կաթոլիկ Եկեղեցու և Արևելյան Ուղղափառ Եկեղեցիների միջև աստվածաբանական երկխոսության միացյալ միջազգային հանձնաժողովի գործադիր հանձնախմբի նիստը։ Հանդիպման նպատակն էր անդրադառնալ հանձնաժողովի ապագա գործունեությանը, ինչպես նաև գնահատել վերջին երկու տասնամյակների ընթացքում արձանագրված առաջընթացը։

Նիստը համանախագահեցին Նորին Վսեմություն կարդինալ Կուրթ Կոխը և Նորին Սրբազնություն եպիսկոպոս Կյուրեղոսը։ Ներկա էին նաև համաքարտուղարները՝ Գերաշնորհ արքեպիսկոպոս Նարեկ Ալեմեզյանը և հայր Հիասինթ Դեսթիվելը։ Դիտորդի կարգավիճակով մասնակցեցին նաև Գերաշնորհ արքեպիսկոպոս Խաժակ Պարսամյանը, Գերաշնորհ մետրոպոլիտ Բառնաբա Էլ Սորիանը և Նորին Գերազանցություն եպիսկոպոս Թովմաս Ադլի Զաքին։

Այս հավաքը կազմակերպվել էր՝ ի պատասխան հանձնաժողովի 2024 թվականի լիագումար նիստի ընթացքում արված առաջարկի։ Այդ առիթով անդամները առաջարկել էին, որ Միացյալ միջազգային հանձնաժողովի 20-ամյակը պատեհ առիթ հանդիսանա վերանայելու երկխոսության ընթացքում պատրաստված փաստաթղթերը և անդրադառնալու կիրառված մեթոդաբանությանը՝ հետագա աշխատանքների հնարավոր բարելավումները բացահայտելու նպատակով։

Հռոմում կայացած այս հանդիպման ընթացքում մասնակիցները խոր և էական քննարկումներ ունեցան թե՛ հանձնաժողովի անցած գործունեության գնահատման, թե՛ երկխոսության հաջորդ փուլերի վերաբերյալ։ Այս խորհրդածությունների արդյունքում մշակվեց մի փաստաթուղթ, որը այժմ կներկայացվի համապատասխան եկեղեցական իշխանություններին՝ քննության և հնարավոր հետագա քայլերի համար։

Չորեքշաբթի՝ մայիսի 13-ին, մասնակիցները նաև առիթ ունեցան ողջունելու Նորին Սրբություն Լևոն XIV-րդ Պապին, ինչը նշանակալի պահ հանդիսացավ նրանց Հռոմ այցի ընթացքում։

Այս հանդիպումը վերահաստատեց Կաթոլիկ Եկեղեցու և Արևելյան Ուղղափառ Եկեղեցիների հանձնառությունը՝ փոխադարձ ըմբռնումը խորացնելու և աստվածաբանական երկխոսությունն առավել ամրապնդելու ուղղությամբ։ Իր քսանամյա գործունեությունը նշող հանձնաժողովի համար այս վերջին հավաքը կարևոր քայլ է՝ հասկանալու, թե ինչպես կարող է երկխոսությունը շարունակել զարգանալ գալիք տարիներին։